Ұлы Абай мұрасы

Абай Құнанбайұлының 175 жылдығына арналған

«Ұлы Абай мұрасы» атты онкүндік

Мақсаты: Абай шығармашылығымен балаларды таныстыру, қызығушылығын арттыру, Абай өлеңдері арқылы тілдерін жаттықтыру, балалардың рухани байлығын, адамгершілік қасиеттерін қалыптастыру. Ұлтымыздың ұлыларының еліне жасаған еңбегін бағалай білуге тәрбиелеу.

2019 жылдың 18-қараша күні «Жұлдыз» балабақшасында Ұлы Абайдың 175 жылдығына арналған «Ұлы Абай мұрасы» атты әдеби-сазды онкүндіктің ашылу салтанаты өтті. Ашылуда балаларға бала Абайдың өмірінен шағын көрініс көрсетілді, сонымен қатар арнайы Абайдың шығармашылығымен таныстырылып, кітап көрмесі ұйымдастырылды.

19-қараша күні мектепалды даярлық балаларының арасында «Ұлы Абайға арнау» тақырыбында мәнерлеп оқу сайысы өтті. Барлығы 25 бала қатысты. Балалар белсене қатысып, жүлделі орындарға ие болды.

20, 21-қараша күндері «Абайдың табиғат лирикасы» тақырыбында өнер пәні мұғалімдерінің қолдауымен ересек пен мектепалды даярлық топтарында жылдың 4 мезгілінің суретін салу байқауы өткізілді.

22-қараша күні «Абай мысалдары» тақырыбында мектепалды даярлық топ балаларының арасында Абайдың И.Крыловтан аударған мысалдарын сахналау сайысы өтті. Онда балалар өзінің әртістік қабілеттерін көрсетіп, образға кіріп, мысалдың мазмұнын көрерменге жеткізе білді.

25-қараша күні «Өлең – сөздің патшасы» тақырыбында балабақша қызметкерлері арасында Абай өлеңдерін мәнерлеп оқу сайысы өткізілді. Бұл сайыста 13 балабақша қызметкерлері өз бақтарын сынады. Көркемсөз оқып, әртістік мәнері мен мәдениетін көрсете білген, өлеңнің мағынасын жеткізе білген мамандар арнайы жүлделермен марапатталды. Демеушілік көрсеткен Целиноград ауданының жастар ресурстық орталығы, кітапхана мамандары әділ-қазы мүшелері болып, төрелік жасады. Сайыста тәрбиеші Джакупбаева Анар «Бас жүлде», тәрбиеші Сқақ Гүлзат І орынға, тәрбиешінің көмекшісі Ахметова Айдана ІІ орынға, қазақ тілі мұғалімі Әскербек Ақдана ІІІ орынға мадақтау қағаздар мен сыйлықтарға ие болды. Белсенділікпен қатысқан тәрбиешілер Абдикова Мирамкуль, Кобландынова Сауле, Ахмедова Салтанат, Азуллаева Саиля, Бейсенбаева Адель, музыка жетекшісі Калиева Клара, тәрбиешінің көмекшілері Кожакулова Рахима, Алтынбекова Гүлдана, Абдикадирова Нейля арнайы Алғыс хаттармен марапатталды.

Онкүндік бойы барлық топ тәрбиешілері ата-аналармен бірлесіп «Дана Абай мұрасы» тақырыбына қабырға газетін жасады.

26-қараша күні «Ұлы Абай мұрасы» атты онкүндіктің жабылу салтанаты өтті. Онда онкүндік аясында іс-шараларда көзге түскен тәрбиешілер мен тәрбиеленушілер өз өнерлерін көрсетті.

Онкүндік бойы балалар да, педагогтар да Абайдың шығармашылығымен сусындап, рухани нәр ала білді. Артына өлмейтін мұра қалдырған ұлы Абай данышпанымыздың 175 жылдығына арналған «Ұлы Абай мұрасы» атты әдеби-сазды онкүндік осылайша өз мәресіне жетті.